الرئيسية > أخبار في الواجهة > سيدي شباط المجدوب

سيدي شباط المجدوب

صراحة شحال من الفرحة غمراتني و انا كانشوف رئيس قدو قداش تايقولوليه شباط كايجول او كايدور في ربوع المملكة السعيدة باش ينفي الاتهامات و يصحح المفاهيم و يزرع الخير و يوعي الناس اللي مقلوبا عليهم القفا، و اللي مافاهمين والو في سياسة السياسيين الي واخدين منا كولشي او مخليين لينا غير الفتات.

جولات السي شباط "الفاسي" بصفته متزعما لآل الفاسي رغم بعد أصوله عن العائلة الفاسية المتحكمة لقرون في عروق الشعب، فكراتني و انا كانتفرج فكلاموا و طريقة تعبيرو فواحد السيد عندوا في قلوب كل مغاربة قيمة عزيزة و كبيرة.

السي شباط و هو كايدوي و يعبر و يعاير فاللي يسواو و اللي ما يسواوش، فكرني فأمثال و حكم و تنبيهات و توضيحات الشخصية التاريخية سيدي عبد الرحمان المجذوب، الله يواليه برحمة الله.

لأنه و بصراحة ما بين عبد الرحمان المجدوب و شباط اللي ربما حتى هو مجدوب، الشيء الكثير من نقط التلاقي، ففي تعريف سيرة المجدوب سيدي عبد الرحمان قالتلينا كتب التاريخ ان الأخير "ساح في البلاد للوعظ والإرشاد والتصريح بما ينفع العباد" و هي ربما نفس الخاصية اللي سيدي شباط المجدوب كايتمتع بها هدي مدة، فمن فاس قال بسم الله أو من الرباط باركها بموافقة أتباعوا و المريدين ديالو، او من مكناس و الجديدة و طنجة و شمالها و طانطان و جنوبها، جال او دار او قاليهوم ماعييتش حتى تفهموني حتى تاخدوا مني النفع و البركة.

سيدي عبد الرحمن المجدوب كان مشهور بديران الخير كان كايطعم الجيعان و يسكن الغريب و يداوي المريض، و كان حتى أسلوبو سياسي شويا، … ماعندوووش مع السياسيين اللي فيهوم الخواض أو الدغل، السي شباط حتى هو كذلك، كايطعم العيالات بجود جاجات ملاحات، أو كايختن الدراري اللي ماعندهومش بلا ريال بلا جوج، و لا عمات لشي سياسي ما عندوش معاه يعطيه و يشاطيه و لا معجبو حال يسيفطو "طرونسفيري" للحبس غير بالكلام.

سيدي عبد الرحمان المجدوب تايقولو باللي قرا و تعلم فجامعة فاس على يد كبار العلماء اللي خلاو فيه الأثر، و كذلك السي شباط المجدوب قرا فاس و ترعرع و توسع و اعطا النتيجة من بعد أقل من 20 سنة ديالا التتلمذ على يد سياسيين كبار او فاسيين من العيار الموزون.

سيدي عبد الرحمان المجدوب كان معروف بالمقالات و الحكايات و الحجايات كلمة واحدة منو تقدر تشرح فيها عام أو ماتساليش، أما السي شباط فهادي هي النقطة الوحيدة اللي مازال ما تقنهاش لأن كلامو مازال شوية تايه او مازال مركز غير هبالات بنكيران، بنكيران اللي استاطع مؤخرا يفهم  و يطبق مقالة قالها سيدي عبد الرحمان المجدوب هادي 500 عام، ملي قال:
لا تسرج حتى تلجم
و اعقد عقدة صحيحة
لا تتكلم حتى تخمم
لا تعود لك فضيحة

الصمت الذهب المسجر
و الكلام يفسد المسالة
إذا شفت لا تخبر
و إذا سالوك قول لا لا.

أما السي شباط المجدوب فيالاه اتقن مقالة وحدة من مقالات سيدي عبد الرحمن المجدوب و اللي تايقول فيها:

سافر تعرف الناس
و كبير القوم طيعو
كبير الكرش و الراس
بنص فلس بيعو.

لكن السي شباط المجدوب فات شويا الحدود، و قرا اللي ماقراه المجدوب الحقيقي، قرا باللي "الجدبة"  أصلها ''تاشوافيت'' و تاشوافيت أصلها بركة الشرفى و الجنون،

اياه داكشي لاش قال داك النهار في قناة وطنية، .. باللي عشيرو بنكيران قدامو قدام النحس،  خاصهوم شويا ديال البراكة باش ما يبقاش فال خايب على خوتنا ديال تركيا و لا حتى التشيك.

إيوا شايلاه ابركة السي شباط المجدوب…و الله ينفعنا او ينفع الجميع من بركة الشرفى و الجدود.

3 تعليقات

  1. chabat 3and raso kaikahel liha w hoa ghir kai3miha

  2. استطاع شباط أن يحول حزب الإستقلال إلى حزب الإنقلاب و الإستغلال…لقد أحسن السيد الوفا حينما اختار مصلحة الوطن على مصالح أأعضائه الشخصية. ونعم الرجال .

  3. سيدي شباط المجدوب عامر غي كدوب
    اه اهه اه اهه

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Close
Please support the site
By clicking any of these buttons you help our site to get better